Monday, November 25, 2013

පේන්ට් බෝල් යුද්ධය Paint Ball War, Sri Lanka

10 comments
ටික කාලෙකට කලින්, හරියටම කියනවා නම් සැප්තැම්බරයේ අග හරියේ අපි යුධ වැදුනා. හැබැයි යුධ වැදුන කට්ටිය යහතින් ආපහුත් ආවා. කාලෙකින් රවුමක් නොගහපු එකේ යන්න තැනක් ගැන කල්පනා කර කර ඉද්දි යමු අඩවියේ ලිපියකින් අපිට හම්බුනා හොඳ ඔත්තුවක්. ඒ හංවැල්ලේ තියෙන පේන්ට් බෝල් අංගනයක් ගැන. තීර්ථ යාත්‍රිකයාට හොඳටම අවශ්‍යවෙලා තිබුනේ පේන්ට් බෝල් ක්‍රීඩා කරන්න ඒ කාලෙ වෙනකොට, ඒ හින්දා මේ ආපු ඔත්තුව නිකං සුරලොවින් ආපු පණිවිඩයක් වගේ උනා :D . එතන නම Hustler's Paint Ball, තියෙන්නේ හංවැල්ලේ ටිකක් ඇතුලට  කැළණි ගඟ අයිනට වෙන්න. ඔන්න පහලින් සිතියමත් දැම්මා.

පැත්තකින් කැළණි ගඟට මායිම් වෙච්චි මෙතන හරියට විමුක්තිකාමී ගරිල්ලන්ගේ කඳවුරක් වගේ. අක්කර 16 ක වපසරියකුත් ඒ වගේම කැලෑබද ගතියත් නිසා අපිට තේරුනා මෙතන පේන්ට් බෝල් වලට කදිම තැනක් කියලා පළමු බැල්මෙන්ම. 

හිමිකරුගෙ නම ෂේන්, ඔහු හොඳ ශක්තිමත් මාංශපේෂීන්ගෙන් යුක්ත හැඩිදැඩි පෙනුමක් තියෙන කෙනෙක්. ඔහු ඇමරිකානු හාමුදාවේ කාලයක් සේවය කරපු බවයි අපිත් එක්ක කිව්වේ. එතන  පොඩි පොඩි ගොඩනැඟිලි කීපයක්  ඒ එක්කම අනාගතයේ විලාස් බවට පත්වීමට නියමිත ගොඩනැඟිලි දෙකකුත් තිබෙනවා. ඒවායේ  අභ්‍යන්තර ඉදිකිරීම් කටයුතු තාම අවසන් නැහැ. තරඟයට ඉන්න ප්‍රමාණය අනුව තෝරාගන්න පුලුවන් විවිද ප්‍රමාණයේ අංගන කීපයක්ම මේ අක්කර 16ක භූමි ප්‍රමාණයේ තියෙනවා. ඒ අංගන වල වැලි කොට්ට, බංකර් වගේ දේවල් හදලා යුද වදින්න සුදුසු පරිසරයක් නිර්මාණය කරලා තියෙනවා.
 අපේ හිටියෙ කුඩා කණ්ඩායමක් නිසා අපි තෝරාගත්තේ කුඩා අංගනයක් සමඟ Last Man Standing ක්‍රීඩාව. ඒ කියන්නේ එක කණ්ඩායමක අන්තිම කෙනාටත් වෙඩි වදිනකල් සටන යනවා.සාමාන්‍යයෙන් එක ක්‍රීඩාවක් මිනිත්තු දහයක් වගේ තමයි තිබෙන්නේ. ෂේන් අපිට කැමෝ ඇඳම් ලබාදුන්නා. ඒ එක්කම එක්කෙනකුට තුවක්කුවක් ,උණ්ඩ 100  ඒ වගේම මුහුණ ආවරණය කරගැනීමට වෙස්මුහුණ බැගිනුත්.ආරම්භ කිරීමට කලින් ෂේන් මූලික අවබෝධයක් ලබාදෙනවා. ක්‍රීඩාව කරන ආකාරය, උපක්‍රමශීලීවන හැටි, පරිසරයේ තිබෙන ස්වාභාවික පිහිටීම් සහ ඉදිකරීම් තම වාසියට යොදාගන්නා ආකාරය වගේ දේවල් ගැන.ඒ එක්කම ඔහු තදින් අවවාද කරනවා තරඟය අතරතුරේදී මොනම හේතුවක් නිසාවෙන්මත් මුහුණ ආවරණය ඉවත් නොකරන ලෙසට. තරඟය ෂේන් සහ තවත් අයෙක් විසින් විනිශ්වය කරනවා. ඒ නිසා ක්‍රීඩාවේ නීතිවලට පිටින් කාටවත් යන්න බැහැ. කෙනෙක් නීතියක් කඩ කලොත් ඔහුව ඉවත්කරලා දානවා ක්‍රීඩාවෙන්.

පේන්ට් බෝල් ක්‍රීඩාවේදී භාවිතාකරන තුවක්කුව සම්පීඩනය කරපු වායුවර්ගයක් පුරවපු එකක්. භාවිතා කරන උණ්ඩය ජෙලටීන්වලින් සාදපු ජිල් බෝලයක් විතර ගෝලයක්. මේ බෝලය පෘෂ්ඨයක හයියෙන් වැදුනාම පුපුරලා තීන්ත පැල්ලමක් හිටිනවා. හොඳම දේ මේකයි, සමහර වෙලාවට මේ බෝලය පුපුරන්නේ නැහැ. :D . අන්න ඒ වගේ වාසනාවන්ත ෂොට් එකක් වැදුන කෙනෙකුට වෙඩි වැදිලත් තරඟයේ දිගටම රැඳී සිටින්න පුලුවනි හැබැයි උණ්ඩය තුවක්කුවේ හෝ ශරීරයේ කොහේ හරි වැදිලා පුපුරලා ගියොත් ඒ කෙනාට සිද්ද වෙනවා මලවුන්ගේ පෙට්ටියට යන්න (Dead Box). ඒක දැල්වලින් ආවරණය කරපු අංගනය කෙලවර තිබෙන හිස් ඉඩක්. මිනිත්තු දහයේ තරඟය ඉවරවෙනකල් වෙඩි වැදිච්චි කෙනාට එතනට වෙලා ඉන්න සිද්ද වෙනවා.මැරිච්චි උදවියට ජීවත්වෙලා ඉන්න අයත් එක්ක කතාකරන්න බැරි නිසා Dead Box එකට ගිය අයට තාමත් තරඟ බිමේ ඉන්න අයත් එක්ක කතාකරන්න අවසරයක් නැහැ. හැබැයි මලවුන්ට ,අනිත් මලවුන් එක්ක කතාකරන්න තහංචියක් නැහැ :D .ෂේන් ලබාදෙනවා පැය හතරක කාලයක්. ඒ පැය හතර තුල මිනිත්තු දහයේ තරඟ ඔබට ඇති තරම් කරන්න පුලුවනි උණ්ඩ ඉවරවෙනතුරු. උණ්ඩ ඉවරවුනොත් නැවත මුදල් ගෙවා උණ්ඩ ලබාගැනීමටත් පුලුවනි.

ඉතිං අපිත් සෙල්ලම් කලා.වැටෙමින් , මුවා වෙමින්, වෙඩි කමින් යුද වැදුනා. ඒ දවස්වල කූඩැල්ලෝ යහමින් හිටපු නිසා කූඩැල්ලා සාමාන්‍යකරණය උනාට පස්සේ අපි උන්ව නොතකා හැරියා. එල්ලිච්ච කූඩැල්ලෝ ෆුල් ටෑන්ක් ගහගෙන බහින්න ඇති :D . අපිට ක්‍රීඩා කරද්දි තමයි හිතුනේ හමුදා සෙබලුන් යුධ පිටියේදී මොනතරම් දෙයක්ද කරන්නේ කියලා. මේ සරල සෙල්ලමකටත් මෙහෙම දැනෙනවා නම් ඇත්තටම ජීවිතය ගැන නොහිතා සටන් වදිද්දි කොයි ආකාරයකට දැනෙනවා ඇතිද ?

ෂේන් ගාව Jet Ski තියෙනවා, ඒ වගේම All-terrain vehicle නැත්තං රෝද හතරේ මෝටර් සයිකල් වගේ එව්වත් තිබෙනවා. අපි නම් එව්වා ට්‍රයි කරන්න ගියේ නැහැ. ඒවගේම එතන තව විවිදාකාර ඉවෙන්ට්ස් සඳහා භාවිතකරන්න පුලුවන් බවයි ෂේන් අපිට කිව්වේ. හොඳින් සන්තෝෂ වෙන්න නම් ටිකක් ලොකු කණ්ඩායමක් එක්ක යන්න. එතකොට ඉලක්ක වැඩි ගණනක් සමඟ තරඟකාරීත්වයත් වැඩිවෙනවා. වෙලාවක ගිහින් බලන්න.ඒක අපූරු අත්දැකීමක් හැබැයි නිකම් හමට වැදුනොත් ටිකක් රිදෙනවා.ඒත් ඒ හැටි ගාණක් නැහැ.

හැන්දෑවෙ අපි නතරවුනේ අම්බලමේ. එතනත් අපූරු තැනක්. සියලු පහසුකම් සහිතව කබානා වගේම කඳවුරු බඳින්න කඳවුරු පිටියකුත් අම්බලමේ තිබෙනවා.කෑම බීම වගේම කටගැස්මත් බොහොම රසයි. පහුවදා උදේ අපි නැවතත් කොළඹට පිටත්වුනා, හැබැයි අපූරු මතකයකුත් හිතේ දරාගන.

ප.ලි : යන්න කලින් ෂේන්ට කතාකරලා දිනයක් සහ වෙලාවක් වෙන්කරගන්න - 077 385 6555

Read More...

Wednesday, November 20, 2013

සූෂී

18 comments

කොච්චර පොෂ් උනත්
හොඳටම ගුණ උනත්
පෝෂ්‍ය පදාර්ථ පිරී තිබුනත්
ආයෙ කන්නෑ සූෂි මම නං.......
Read More...

Monday, August 26, 2013

MongoDB වලට පූර්විකාවක්

7 comments
MongoDB ගැන මුලින්ම අහන්න හම්බවුනේ කාලෙකට කලින් node.js සහ Single page applications ගැන ඔපීසියේදී කතාවෙද්දි NoSQL වලට කතාව ඇදිලා ආපුවාම. මේ කතාකරන්නේ මොකක් ගැනද කියන එක පොඩ්ඩක් අපහැදිලි වගේ නම්, පුංචි පැහැදිලි කිරීමක් කරන්නම්. Mysql කියන්නේ ඩේටා බේස් සිස්ටම් එකක් කියල හැමෝම දන්නවනේ. MongoDB කියන්නෙත් ඩේටාබේස් සිස්ටම් එකක් හැබැයි ඒකෙ විදිහ mysql හරි sql හරි වගේ නෙවෙයි ටිකක් වෙනස්.

Mysql හරි sql හරි ගත්තාම ඒවා Relational Database Systems. සරලව කිව්වාම දත්ත ගබඩා කරගන්න ටේබල්ස් තියෙනවා. ටේබල් වල තියෙන කොලම් එකකින් හරි කීපෙකින් හරි අනෙක් ටේබල් එකක් හරි කීපයක් හරි එක්ක සම්බන්ධකම් හදාගන්නවා. ඒකනේ Relational කියන්නේ. Mongo වගේ Nosql ඩේටා බේස් මීට වඩා වෙනස්.රිලේෂනල් ටේබල්ස් නැහැ. ඒ වෙනුවට දත්ත ගබඩා කරන්නේ JSON Object වගේ.

i.e
{ "firstName":"Amila" , "lastName":"Bandara" }

Mongodb වල දත්ත ගබඩාකරන විදිහට කියන්නේ BSON  කියලා. ඒ කියන්නේ JSON වල binary වර්ෂන් එක කියන අර්ථෙන්. MongoDB එකක Users කියලා Collection එකක් තිබුනොත් ඒක මේ වගේ වෙන්න පුලුවන්. ඔතන Collection කියලා කියන්නේ Mysql භාෂාවෙන් කියනවා නම් Table එකක් කියන එක.නමුත් මතක තියාගන්න ඕන කාරනාව තමා මේ කියන Collection , mysql table වලින් හාත්පසින්ම වෙනස් කියන එක.


මේක දිහා බලද්දි පැහැදිලිව පෙනෙනෙ දේ තමයි මේ documents වල සමාන වගේම වෙනස් Fields තියෙනවා කියන එක. Mongodb වල Document එකක් කියල කියන්නේ Mysql Table එකක එක Record එකක් වගේ දෙයකට. එතකොට Collection එකක් කියල කියන්නේ Document එකකට හෝ ගොඩක එකතුවකට.

Mysql වගේ ස්ථාවර Relational DBMS තියෙද්දි Mongodb වගේ දේවල් ඇතිවෙන්නත් මොකක් හරි හේතුවක් තියෙන්න ඕන. Mongodb කරලියට එන්නේ මොනවගේ පදනමකින්ද ?

Mysql වගේ Relational databases ඩිසයින් කරද්දි අපි Keys සහ indexes තියාගන්නවා Tables අතර Relationships හදාගන්න සහ Query වලට කාර්යක්ෂමව දත්ත අරගන්න පුලුවන් වෙන්න. ඒ වගේම දත්ත අනවශ්‍ය විදිහට රිපීට් වෙන එක හෙවත් Data Redundancy වලක්වන්න  Normalization කියලා ක්‍රියාපටිපාටියකට ලක්කරනවා. මේ Normalization එකේදී තියෙන Tables කැඩි කැඩී තව තව Tables හැදීම සිද්ද වෙනවා.(ඒ එක්කම keys සහ Indexes  ගානත් වැඩිවෙනවා.) එතකොට දත්ත ආපහු ගනිද්දි වැඩි වැඩියෙන් Joins ගහන්න සිද්ද වෙනවා.ඒක සාමාන්‍යයි. නමුත් ප්‍රශ්නෙ පටන් ගන්නෙ ඩේටාබේස් එක ලොකු වෙද්දි. ඩේටාබේස් එක ලොකු වෙන්න ලොකු වෙන්න, ඒක දත්ත වලින් පිරෙන්න පිරෙන්න Query වල කාර්යක්ෂමතාවය අඩුවෙලා මුලු System එකම Slow වෙන්න ගන්නවා.

Mongo වගේ Nosql දත්ත පද්දති වලින් විසඳන්න හදන්නේ ඔන්න ඔය ප්‍රශ්නයයි. ඒවාට අති විශාල දත්ත සම්භාරයක් හසුරවන එක, අපහසුතාවයකින් තොරව Query වල කාර්යක්ෂමතාවය අඩුනොකර දත්ත Retrieve කරන එක ප්‍රශ්නයක් නෙවෙයි. ප්‍රධානම වාසිය තමයි අධික වේගය.

මේවගෙත් අඩුපාඩු නැතිවා නෙවෙයි. දත්තවල විශාලත්වය සාපේක්ෂව වැඩියි. ඒ වගේම Mongo Indexing වලට භාවිතාකරන ක්‍රමය නිසා අනවශ්‍ය විදිහට Memory නාස්තිවීමකුත් සිද්ද වෙනවා. ඔය දෙක තමයි ප්‍රධාන අඩුපාඩු විදිහට කියන්න තියෙන්නේ.

ඉතිං Mongodb වගේ Nosql ජාතියේ ඩේටාබේස් නිසා Mysql සහ Sql වල පල්ලට යාවිද ? තීර්ථ යාත්‍රිකයා නම් හිතන්නේ එහෙම නොවෙන බවයි. මොකද අපි මිටිය ඕන තැනට මිටියත් , නියන ඕන කරන තැනට නියනත් පාවිච්චි නොකලොත්  කරන්න යන වැඩේ සාර්ථක නොවෙන නිසා. අනික් දේ තමයි Mysql වලට මිලියන 300ක රෙකෝර්ඩ්ස් වුනත් ප්‍රශ්නයක් නැතිව හැන්ඩ්ල් කරන්න පුලුවනි. ඒ නිසා අපිට හදන්න වෙන ගොඩාක් Systems වලට Mysql ප්‍රමාණවත්. අධිය වේගයකුත් එක්ක ලොකු ඩේටාබේස් එකක් හැන්ඩ්ල් කරන්න වෙන අවස්ථාවන් වලට Mongo හොඳ විසඳුමක් විදිහටයි සැලකෙන්නේ. Mongodb කියන්නෙ අලුත් දෙයක්. ඒ නිසා විවිද Bottle -necks වගේම Bugs තියෙන්නත් පුලුවන්. මෙමරි මැනේජ්මන්ට් සම්බන්ධයෙන් Open වෙච්චි Ticket එකක් තාම තියෙනවා Close නොවී . :D . හැබැයි තොරතුරු තාක්ෂණ ක්ෂේත්‍රය වගේ සීග්‍රයෙන් වෙනස් වෙන ක්ෂේත්‍රයක රැකියාව කරන උදවිය මේ වෙනස් වෙන තාක්ෂණයන් ගැන අවදානයෙන් ඉඳලා යම් තරමකට හරි එව්වා අතපතගාල හුරුවෙලා, අවබෝධයක් ලබාගෙන තියෙන එක නුවණට හුරුයි. ඒක ක්ෂේත්‍රයේ ඉදිරියට යන්න උපකාර කරාවි.
Read More...

Monday, July 29, 2013

ක්‍රිප්ටෝනියානුවන්ගේ පුනරාගමනය Man of Steel 2013

8 comments

ක්‍රිප්ටෝනියානු නටඹුන් අතරින් සුපර් මෑන් ආයෙත් ඇවිල්ලා. ඒ මෑන් ඔෆ් ස්ටීල් (Man of steel) 2013 චිත්‍රපටිය තුලින්. බලාපොරොත්තු වුන විදිහටම තාක්ෂණික ශ්‍රව්‍ය සහ දෘශ්‍ය ප්‍රයෝග රැසක් සමඟින්. නමුත් කතාවේ ගලායාම නම් බලාපොරොත්තු කඩ කරවන සුලු බවයි තීර්ථ යාත්‍රිකයාගේ පුද්ගලික මතය. ඒ වගේම මෙම චිත්‍රපටයේදී සුපර්මෑන් යට ඇඳුම නිවැරදිව ඇඳීමට ඉගනගෙන තිබෙනවා :D .


  •  ඇමරිකානු පාලනය කිසිදු ප්‍රතිරෝධයකින් තොරව ක්ලාර්ක් කෙන්ට් (සුපර් මෑන්) ජෙනරාල් සොඩ් ට බාර දීම.
ජෙනරාල් සොඩ් පෘථිවියට පැමිණ ක්ලාර්ක් කෙන්ට්ව තමන්ට බාර දෙන ලෙසට තර්ජනය කිරීමක් සිදුකරන්නේ ලොව පුරා රූපවාහිනී විකාශයන්ට බාධාවක් ඇතිකරමින් ඒ හරහා තමන්ගේ විකාශය සිදු කරමින්. ඒ හැරෙන්නට පෘථිවියට ඔහු පහර දීමක් හෝ තම බලය පෙන්වීමක් සිදුකරන්නේ නැහැ. එබඳු පසුබිමක් තුල ඇමරිකානු පාලනය කිසිදු කතාවකින් හො ප්‍රතිරෝධයකින් තොරව සුපර්මෑන්ව ජෙනරාල් සොඩ්ට භාරදීමට තීරණය කිරීම ඒ හැටි ගැලපීමක් නැහැ. එමෙන්ම සියලු වැදගත් තීරණ ගැනීමේදී පෙන්වන්නේ එකම හමුදා නිලධාරීන් පිරිසක් පමණයි. ඇමරිකානු ජනපතිවරයා හෝ ආරක්ෂක ලේකම් හෝ එක්සත් ජනපදය සතු අකුරු තුනේ ඒජන්සිවල ප්‍රධානීන් බඳු ජාතිකාරක්ෂාවට අවශ්‍ය තීරණාත්මක තීරණ ගැනීමේදී  වැදගත්ම චරිත නොසලකාහැරීමකට ලක්කොට තිබෙනවා.

  • ජනරාල් සොඩ්ගේ නියෝජිතවරිය ක්ලාර්ක් කෙන්ට් සමඟ ලුයිස් ලේන්වද තමන්ට භාරදෙන ලෙස කීම.
ක්ලාක් සහ ලුයිස්ගේ අතර සම්බන්ධයක් ක්‍රිප්ටෝනියාවන් දන්නේ නැහැ. හේතුවක් නැතිව නිකම් හිතුමනාපයට නොදන්නා පෘථිවි වාසියෙක් තම යානයට රැගෙන යාමට ජෙනරල් සෝඩ්ට ඇති ඇඟේ අමාරුව කුමක්ද ?  “ලුයිස් ක්‍රිප්ටෝනියන් යානයට ගෙනයාම“ සිද්ධිය කතාව වෙනස් කිරීමට ප්‍රභල ආකාරයෙන් දායක වෙනවා. නමුත් ඇයව යානාවට ගෙනයාමට ප්‍රභල හේතුවක් නැහැ.
 
  • ක්‍රිප්ටෝනියාවන්ගේ සහ ක්ලාක් කෙන්ට්ගේ ගැටුම්වලින් සිදුවන මහා ජන සංහාරය සහ දේපල විනාශය. 
සුපර්මෑන් කියන්නේ වීරයෙක්, දුබලයින් පීඩාවලින් ගලවාලන්නෙක්, ඔහුගේ පපුවේ තිබෙන්නේ බලාපොරොත්තුවේ සංකේතය. නමුත් ඔහු සහ සොඩ් අතර සටන නිසා ජීවිත මෙන්ම දේපලද විශාල සංඛ්‍යවක් විනාශවෙනවා. කෙන්ට් ට අවශ්‍යතාවයක් තිබුනා නම් ඔහුට හැකියාව තිබෙනවා සොඩ් සමඟ සටන ජන ශුන්‍ය කලාපයකට රැගෙන යාමට.නමුත් ඒ වෙනුවට ඔහු කරන්නේ අධිජනාකීර්ණ ප්‍රදේශයක සොඩ් සමඟ සටන් කිරීමයි. (සොඩ් සහ කෙන්ට් අතර පළමු සටන). ක්‍රිප්ටෝනියානුවන්ගේ World Engine සහ පහරදීම් නිසා විශාල ප්‍රමාණයක් ජනයා මිය යනවා. එමෙන්ම හමුදාව සතු ගුවන් යානා විනාශවෙනවා. කෙන්ට්ද මේ අවස්ථා දකිනවා. නමුත් අන්තිම මොහොතේදී මිනිසුන් කිහිපදෙනෙකු විනාශකිරීමට සොඩ් උත්සාහ දරන වෙලාවේදී එය  නැවැත්වීමට කෙන්ට් හැඟීම්බර වන ආකාරයෙන් දහයෙන් පංගුවක් වත් කෙන්ට් උක්ත අවස්ථාවන්හිදී දක්වන්නේ නැහැ.
 
  • ලුයිස් ලේන් අන්තිම මොහොතේදී කෞතුකාගාරය තුලට ඉන්ද්‍රජාලයකින් මෙන් පැමිනීම.
සොඩ් සහ කෙන්ට් අතර සටන කිලෝමීටර් ගණනාවක් පුරාපැතිරී යනවා. අන්තිම මොහොතේදී කෙන්ට් සෙඩ් මරාදමන්නේ කෞතුකාගාරයක් ඇතුලේ. එය පිහිටාතිබෙන්නේ World Engine  හි ක්‍රියාකාරීත්වය නිසා විනාශනොවූ ගොඩනැඟිලි පිහිටි ප්‍රදේශයක. නමුත් World Engine තිබූ තැනම නටඹුන් ගොඩේ සිටින ලුයිස් අන්තිම මොහොතේදී කෞතුකාගාරය තුලට පැමිනෙනවා. 

මෙබඳු ආකාරයේ නොගැලපෙන ස්ථාන රාශියක්ම සුපර්මෑන් නවතම චිත්‍රපටියේ තිබෙනවා. නමුත් ඒ සුපර්මෑන්, කොහොමද අහක දමන්නේ.. ඒ නිසා තීර්ථ යාත්‍රිකයා දෙවරක්ම එය නැරඹුවා.  :D

ප.ලි : වැල්ලවත්තේ සැවොයි 3D වල තාම මෑන් ඔෆ් ස්ටීල් තිරගත වෙනවා.
 
 

Read More...

Tuesday, July 2, 2013

බ්‍රවුනා මිය ගියේය......

16 comments
හාපෝ මේ මොකෙද්ද ? . අප්පච්චි එහෙම ඇහැව්වේ බයිසිකලේ ඉස්සරහ හයි කරලා තිබ්බ කූඩෙට එබිල බලලා. “මේ ඇවිල්ලා බල්ලෙක්, ඉංග්‍රීසියෙන් කියන්නේ ඩෝග් කියලා.නම බ්‍රවුන්..“අප්පචිචි, බල්ලො කියන්නේ කිරි බීල වැඩෙන සත්තු ජාතියක් , ඒ හින්ද එයාට දෙන්න කිරි පැකට් එකක් ඕනා.....හීන් සීරුවේ මං එහෙම කියල දැම්මම අප්පච්චි හිනා වුනේ “හොඳා හොඳා ගෙනාව වගේම හදමුකෝ එහෙනං “ කියලයි..එහෙමයි බ්‍රවුන් අපේ ගෙදරට ආවේ.
**************************************************
පාවෙල් කොර්චාගීන්.ඔව් ඒකයි එයාගෙ නම...නිකොලොයි ඔස්ත්‍රොව්ස්කිගේ “වානේ පන්නරය ලැබූ හැටි“ පොතේ එන ප්‍රධාන චරිතය.එයා සමාජවාදියෙක්, සෝවියට් සංගමය වෙනුවෙන් දිවි දෙවනි කරලා කැපවුන සැබෑම කොමියුනිස්ට්වාදියෙක්. ඒ මට රුසියන් පොත් හොඳට අල්ලලා ගිය කාලේ. කොමියුනිස්ට්වාදීන් සෝවියට් සංගමය බිහිකරපු හැටි, යොවුන් තරුණ තරුණියෝ, කොමිසමෝල් (යොවුන් කොමියුනිස්ට් සංගම්) හරහා , හිමින් හිමින් ගොඩ නැගෙන තමන්ගෙ රට වෙනුවෙන් වැඩ කරපු හැටි මම කියෙව්වෙ හරිම ආසාවෙන්.රුසියාව තමයි ඒ කාලෙ ප්‍රියතම රට.ඉතිං ඒ ප්‍රියතම රට වෙනුවෙන් බ්‍රවුන්ට අලුතිං රුසියන් නමක් තියන්න මම තීරණය කරපු එක අරුමයක් නෙවෙයි.
**************************************************
“ව්ලැදිමීර් බ්‍රවුනොව්ස්කි“.නියම සෝවියට් ආරයට යන දිව පැටලවෙන සුලු ගරු ගාම්භීර නමක්.හැබැයි එකම එක පරහක් තිබුන. ඔය නමෙං බල්ලට අඬ ගහන එක පන යන වැඩක් වගේම ඔය නමට බල්ලා එන එකත් කෙරෙන්නැති දෙයක්.වාසනාවට රුසියාවෙන්ම මට ඒකට පිලිතුරක් දීල තිබුන. සාමාන්‍යෙයන් සෝවියට් දේශයේ උදවියට නං දෙකක් තියෙනවා.එකක් නියම නම, අනෙක හුරතලේට කියන එදිනෙදා පාවිච්චියට ගන්න නම. පාවෙල් කොර්චාගීන්ගේ හුරතල් නම “පාවුකා“  ඒ විදිහටම අපේ ව්ලැදිමීර් බ්‍රවුනොව්ස්කිගෙ හුරතල් නම “බ්‍රවුනා“  විදිහට තීන්දු උනා. නිල නිවේදනය නිකුත් කලාට පස්සේ හැමෝම බ්‍රවුන් වෙනුවට බ්‍රවුනා කියන නම පාවිච්චි කරන්න පටන් ගත්තා.ඒක උල්ලංඝනය වුනේ එකම එක්කෙනෙක් අතිං විතරයි. ගෙදර වැඩට හිටපු නැන්දට  “බ්‍රවුනා“ කියන එක උච්චාරණය කරන්න බෑ. එයා බ්‍රවුනට කන්න දෙද්දි අඬගැහුවෙ මේ විදිහට...  “බුරං..... බුරං...බුරං.....“
**************************************************
අපි හැමෝටම වගේ විනෝදාංශ තියෙනවා. බ්‍රවුනටත් තිබුනා..යටත් පිරිසෙයින් අපි එහෙම හිතුවා.උට තිබුනෙ ප්‍රධාන විනෝදාංශ දෙකයි.
1) මිනිස්සු පස්සේ කන්න එනවා වගේ බොරුවට එලවීම.
2) ගෙදරට එන උට අල්ලන්නැති උදවියට හපා කෑම.
පලවෙනි විනෝදාංශයට බ්‍රවුනා පාවිච්චි කලේ ළමයි ඉස්කෝලෙ යන, මිනිස්සු වැඩට යන උදේ කාලය සහ මිනිස්සු වැඩ ඇරිල එන හවස් කාලය. අපේ ගෙදර වත්ත තියෙන්නේ පාරට මුහුනලා ඒක බ්‍රවුනට හොඳ දඩබිමක්. වත්තේ කෙලවරට වෙලා පාර අයිනේ බ්‍රවුනා බලං ඉන්නවා උදේම ගිහිල්ලා. බයකරන්න සුදුසු කෙනෙක් එනකල්. ඊට පස්සේ ඒ කෙනා පස්සෙං වත්තෙ අනිත් කෙලවරට එනකල් එලවං යනවා. ඒ කෙලවරේ නතර වෙනවා. අයේ කවුරු හරි සුදුසු ගොදුරක් එනකල් බලං ඉන්නවා. පොඩි උං කකුල් කරේ තියන් දුවන එක, මිනිස්සු කකුල් සයිකලේ හැඬල් එකේ තියං කඩාගන බිඳ ගෙන යන එක උට සෑහෙන විනෝදයක් තියෙන්න ඇති.

දෙවනි විනෝදාංශය අපිට තේරුම් ගන්න ටික කාලයක් ගියා. ඌ හැමෝටම හැපුවෙ නෑ. තෝරාගත් කීපදෙනෙකුට විතරයි හැපුවේ. මනුස්සයෙක් ගෙදරට එනකොටම ඌ තීරණයක් ගන්නවා හපනවද නැද්ද කියලා. හපනව කියල තීරණය කලොත් ඌ බුරන්නෙ නැහැ. හිමීට සද්ද නැතිව ඉන්නවා. මිනිහෙකුට හපන්න උට හැමතිස්සෙම එක සාධාරණ හේතුවක් තිබුනා. ඒ ඌව ස්පර්ශ කිරීම. බ්‍රවුනව අතින් අල්ලන්න අවසර තිබුනේ ගෙදර උදවියටයි ළඟම හිතවතුන්ටයි පමණයි. ඌව කකුලින් ස්පර්ශ කරන්න අවසරේ තිබුනේ අප්පච්චිටයි මටයි විතරයි. ඒක උල්ලංඝනය කලා නං ඌ කෑවා.ඒක තමයි බ්‍රවුනගෙ ට්‍රික් එක. මිනිහෙකුට හපන්න ඕන නං ඌ ළඟට වෙලා බලං ඉන්නවා . කං කඩා වැටිලා හුරතල් පාටට කුරු බල්ලෙක් ලඟට ආපුවාම කාටද අල්ලලා හුරතල් කරන්න හිතෙන්නැත්තේ (ගෙදරට එද්දි බිරුවෙත් නෑනේ). “අනේ බ්‍රවුන් “ කියලා ඌව අල්ලපු ගමන් ඌ කෑවා.සමහර උදවිය ඒත් බල්ලව අල්ලන්නෑ. එතකොට බ්‍රවුනා කරන්නේ ඒ කෙනාගෙ පුටුවට හුඟාක් ළංවෙලා එයාගෙ කකුල් වලට ගෑවෙන නොගෑවෙන හරියෙන් බුදියගන්නවා. මනුස්සයා නැගිටලා යද්දි අනිවාර්යෙන් බල්ලගෙ ඇඟේ කකුල වදිනවනේ. එතකොට උඩ කියපු සාධාරණ හේතුව පෙන්නල් බ්‍රවුන ඒ කෙනාව හපා කනවා. අපි බ්‍රවුනගෙ ට්‍රික් එක තේරුම් ගත්තට පස්සේ එන අයට ඒ ගැන කියලා අනතුරු අඟවනවා. එකම එක දවසක් බ්‍රවුනගෙ ට්‍රික්ස් මුකුත් හරිගියේ නැහැ. එදා ඌ කලේ ඈත ඉඳලා දුවං ඇවිල්ලා හයියෙන් ඇඟේ හැප්පිලා කාපු එක.බ්‍රවුනා කාපු අය අතරෙ මගේ අක්කගෙ පොඩි පුතත් හිටියා.
**************************************************
බල්ලො කියන්නේ හුඟක් කපටි ජාතියක්. කවුරුහරි එහෙම නෑ කියනවනං එයාට වැරදිලා, එයා බල්ලො ගැන දන්නෑ හරියට.එක දවසක් අල්ලපු ගෙදර ගෑනු කෙනා එහා ගෙදර ගෑනු කෙනාටයි එයාගෙ බල්ලටයි බනිනවා ඇහෙනවා එක සීරුවට.
නිමිත්ත : අල්ලපු ගෙදර කුකුල් කොටුවෙන් කුකුලෙකු පැහැරගෙන මරා කා ඇත.
අල්ලපු ගෙදර කතගේ නිරීක්ෂනය  : එහා ගෙදර බලු කොටුව ළඟ කුකුල් පිහාටු ගොඩකි.
අක්කාගේ නිරීක්ෂය : එහා ගෙදර බල්ලා කොටුවට දමා ලොක් කර ඇත. 
අක්කාගේ හා මගේ නිරීක්ෂනය : බ්‍රවුනා කුස්සිය අස්සේ සිටී, උගේ කට වටේ කුකුලන්ට අයත් සියුම් පිහාටු ගොන්නකි. ඌ කටුවක් හපමින් සිටී.
නිගමනය : බ්‍රවුනා එහා ගෙදරින් කුකුලෙකු අල්ලාගෙන මෙහා ගෙදර බලුකොටුව අසලට වී කුකුලා කා දමා  ඇත.
ඔය එක සිද්දියක් විතරයි.
**************************************************
 ගොඩක් බල්ලො තමන්ගෙ හාම්පුතාලට හරිම ආදරෙයි. අපි කොහේ හරි ගමනක් ගියාම බ්‍රවුනා අපි එනකල්ගේට්ටුව ගාව බලන් ඉන්නවා. ආපුවාම ඇඟට පැනලා ලෙවකාල කෑගහලා බුර බුරා වටේ නට නටා එකම විකාරයක් කරනවා.ගොඩක් පරක්කු වුනොත් පාරටම ඇවිත් බලං ඉන්නවා. ඈතින් වාහනේ එනකොට නලල රැලි කරං බලං ඉන්නවා හරියටම අඳුනගන්නකල්.හරියටම අඳුනගත්තම උගෙ මූන වෙනස් වෙනවා..මං හිතන්නේ ඒ බල්ලො හිනා වෙන හැටි වෙන්න ඇති. ඊට පස්සේ උට ඉවසිල්ලක් නෑ අපි බහිනකල්...
***************************************************
බ්‍රවුනා අපිත් එක්ක ගොඩ කාලයක් හිටියා. අපිට පුදුම විදිහට සමීප වුනා.අප්පච්චි පුරුද්දට වගේ හැමදාම පාන්දර හතරට නැගිටපුවාම බ්‍රවුන එනව තේ ඉල්ලගන. දොර වහල තිබ්බොත් දොරට හොම්බෙන් ඇන ඇන කෙඳිරිගානවා, දොර ඇරියම කුස්සිය ඇතුලට ඇවිල්ලා තේ එක හම්බවෙනකල් බඩගිනි බව පෙන්නන්න බොරුවට ඈනුම් යවනවා.අපි කාපු බීපුවගෙන් ඌ නොකෑවෙ අන්නාසි විතරයි. දෙහි යුෂ පවා බොන්න බ්‍රවුනා පුරුදු වෙලා හිටියා.
***************************************************
ඒ කාලෙ එනකොට මම උසස් අධ්‍යාපනය හමාර කරන්න අන්තිම කොටස වෙච්චි ක්ෂේත්‍ර පුහුණු වැඩ සටහනට කොළඹ ඇවිල්ලා හිටියේ, ආධුනික පරිගණක ක්‍රමලේඛ ශිල්පියෙක් විදිහට වැඩ කරන්න. හැමදාම හැන්දෑවට ගෙදරට කතාකරනවා කරදරයක් නැතිව හොඳින් ඉන්නවා කියන්න. එක හැන්දෑවක ගෙදරට කතා කරද්දි අක්කගෙ ස්වරයෙ තිබුනෙ අමුත්තක්.ඒ අමුතු ස්වරයෙන් “බ්‍රවුන නැති වුනා“ චූටි මල්ලි කියල අක්කා කිව්වාම මට දැනුනේ අමුතු හැඟීමක්.බල්ලෙක්ගෙ මරණය මිනිහෙකුට දුකක් ඇති කරන්න පුලුවන්ද ? මං හිතන්නෙ පුලුවන්.ඊළඟ සති අන්තෙ මම ගෙදර යනකොට ගේට්ටුව ගාවට නට නටා දුවං එන්න බ්‍රවුනා හිටියෙ නෑ. බ්‍රවුනා නැති වුනා කියලා ..... ඉකි ගහ ගහ අඬපු අක්කගෙ පොඩි එකා මාව බදාගද්දි , කාලෙකට කලින් බ්‍රවුනාම හපල ඇති වෙච්චි තුවාල කැලල පොඩි එකාගෙ වලලුකරේ තියනවා මම දැක්කා.
***************************************************
බ්‍රවුනාගෙ මරණයෙන් මේ වෙනකොට සෑහෙන කාලයක් ගෙවිල ගිහිල්ලා, ඒත් අපි ඉඳල හිටල තාමත් බ්‍රවුනා ගැන කතාකරනවා.ගෙදර ඉන්න බල්ලා මොකක් හරි ගොං වැඩක් කරපුවාම , “බ්‍රවුන හිටියනං ඔහොම කරන්නෑ“ කියන එක පවුලෙ කාගේ හරි කෙනෙක්ගෙ කටින් කියවෙනවා. 

අපි ආදරය කරපු උදවිය අපි අතරින් වෙන් වෙලා ගියාම අපි එයාලව අමතක කරන්නෑ, එයාල ගැන නිතරම කතා නොකලත් ඒ එය වෙනුවෙන් හිතේ පුංචි ඉඩක් තියාගන ඉන්නවා. අපි තනියම ඉද්දි එයාලත් එක්ක කරපු කියපු දේවල් මතක් වෙලා අපිට හිනා යනවා, ඇස්වලට කඳුලු එනවා, එහෙමයි අපි වෙන්වෙලා ගියපු සහෘදයන්ව මතක තියාගන ඉන්නේ.මම හිතන්නේ අපේ පවුලෙ උදවියටත් මරණය තෙක් බ්‍රවුනාව අමතක නොවේවි....
බ්‍රවුනා , අක්කාගෙ ලොකු පුතාත් සමඟ


2011 ජූනි මාසයේ මියගිය බ්‍රවුනාගේ මතකය වෙනුවෙනි...............

Read More...

Sunday, June 9, 2013

සිත් ඇදගත් මාලා නාටක (මම බලන ටීවී සීරීස්) 2

Leave a Comment

පහුගිය ලිපියෙන් The Mentalist සහ Game of Thrones ගැන ලියවුනා. අද ලිපියෙන් ලියන්න බලාපොරොත්තු වෙන්නේ බාගත කරගෙන නැරඹුවාට පාඩු නැති තවත් මාලා නාටක ද්විත්වයක් ගැනයි.

 3.Terra Nova  (ටෙරා නෝවා)

ඊ.ටී (E.T. the Extra-Terrestrial) , ජුරාසික් පාක් (Jurassic Park) , ෂින්ඩර්ස් ලිස්ට් (Schindler's List) වගේ සිනමා පට බිහිකරපු ස්ටීවන් ස්පීල්බර්ග් මතකද ? ඔහුගේ දායකත්වයෙන් ගොඩනැගුන අපූරු තේමාවක් රැගත් ටීවී සීරීස් එකක් විදිහට ටෙරා නෝවා හඳුන්වන්න පුලුවන්. 
විශිෂ්ඨ සිනමා නිර්මාණ කරු - ස්ටීවන් ස්පීල්බර්ග් මහතා

සාරාංශගතව කතා මාලාවේ ගලායාම ගැන කිව්වොත්, ඒ වරෂ 2149 යි, අධික ජනගහණය සහ කාර්මීකරණය නිසා පෘථිවිය කෙමෙන් කෙමෙන් මිනිස් වාසයට නුසුදුසු තත්වයට පත්වෙමින් පවතිනවා. මේ අතර විද්‍යාඥයින් සොයාගන්නවා අලුත්ම විසඳුමක්. ඒ සමාන්තර කාලරාමුවක පෘථිවියේ අතීතයට මිනිසුන් සහ භාණ්ඩ ප්‍රවාහනය කිරීමේ ක්‍රමයක්. ඒ තුලින් ඔවුන් තෝරාගත් පිරිස් යවනවා එම සමාන්තර කාලරාමුවේ පෘථිවියේ ක්‍රිටේෂියස් අවධියට ( Cretaceous ). කතාවෙ මතුපිටින් බැලූ බැල්මට පෙනෙන්නේ ඔවුන්ගේ ප්‍රධාන අභිප්‍රාය වන්නේ මිනිසුන්ට ජීවත් වීමට සුදුසු කොලනියක් එම යුගයේ තනා මනුශ්‍ය වර්ගයාගේ අනාගතය සුරක්ෂිත කිරීමට බවයි. නමුත් කතාව ගලාගන යද්දී ප්‍රධාන අරමුණ එය නොවන බවත් එහි සැඟවුන අභිප්‍රායක් තිබෙනව බවත් පෙනීයනවා. ඉතින් මේ අතීතයට යන උදවිය අතර සිටින ෂැනොන් පවුල වටා තමයි කතාව ගෙතෙන්නේ. 

 
ටෙරා නෝවා පූර්ව ප්‍රචාරක පටයක්
 
අලුතින් කොලනිය ගොඩනගන්නට යන අය මුහුණ දෙන අභියෝග බොහොමයි. ක්‍රිටේෂියස් යුගය කියන්නේ ඩයිනෝසරයන්ගේ ස්වර්ණමය යුගය. ඉතින් මුහුණ දෙන අභියෝග අතරට පරිසර සාධක වගේම වෙනමම න්‍යායපත්‍ර වෙනුවෙන් එවුන උදවියත් අයත් වෙනවා.
අවාසනාවට පළවෙනි සීසන් එකෙන් පසුව මෙම කතාමාලාව විකාශය අත්හිටවුනා. Fox ආයතනය එය තවදුරටත් නිෂ්පාදනය නොකිරීමට තීරණය කර තිබෙනවා. බොහෝ දුරට ඒ අධික නිෂ්පාදනය වියදම සහ Fox ආයතනය මහා පරිමාණයේ Sci-fi නිර්මාණ තීරණය කිරීමත් එයට හේතු වන්නට ඇති. දෙවන කොටස වෙනත් නාලිකාවක් ආශ්‍රයෙන් විකාශය කිරීමට බලාපොරොත්තුවන බව නිර්මාණ කන්ඩායම පවසා ඒ සඳහා නිශ්චිත දිනයක් ඔවුන් ප්‍රකාශට පත්කර නැහැ. ඒ වගේම එම දෙවනි කතාමාලාව පළමු කතාමාලාවට වඩා අඩු නිශ්පාදනය වියදමකින් කිරීමටත් ඔවුන් තීරණය කරලා.

4. රෙවොලූෂන් Revolution

පළවෙනි සීසන් එක මේ වෙනකොට විකාශය වී හමාරයි.  බොහෝ විට මෙය කියවන ඔබත් මෙය නරඹන්නට ඇති. මෙයත් Sci-Fi ගනයට අයත් වන කතාමාලාවක්. එක් වරම ලෝකයේ විදුලි බලය ඇණ හිට, ඒ වගේම සියලු යන්ත්‍ර සූත්‍ර ක්‍රියා නොකරන තත්වයට පත්වූවොත් කුමක් වේවිද ? අන්න ඒ ගැනයි මේ කතාව. මිනිත්තු කීපයක් ඇතුලත නවීන ලෝකය කරත්ත, පැරණි තුවක්කු ආදිය භාවිතා කරන තත්වයට පත්වෙනවා. රටවල් කඩා වැටෙනවා , ජන ජීවිතය අවුල් වෙනවා. මුලු ලෝකයම අවුල් ජාලාවක් බවට පත්වෙනවා. ඇමරිකාව රටවල් කීපයකට කැඩී යනවා. බොහෝ දෙනෙකු මෙයට හේතුව දන්නේ නැහැ.නමුත් කතාමාලාව ගලායාමේදී නරඹන්නන්ට තේරුම් යනවා මෙයට හේතුවත් අනවශ්‍ය මිනිස් ක්‍රියාකාරකමක් බව.

 රෙවොලූෂන් පූර්ව ප්‍රාචාරක පටයක්

මෙයින් එහාට මේ ගැන විස්තර කිරීමට තීර්ථ යාත්‍රිකයා බලාපොරොත්තු වන්නේ නැහැ. නමුත් බොහෝම රසවත් කතාවක්. භාගත කරගෙන බැලුවාට ඔබට පාඩුවක් නෙවේවි......


 


Read More...

Tuesday, June 4, 2013

හැක් වීම Being Hacked

4 comments

“අනේ අයියෙ මටත් කියල දෙන්නකො  facebook හැක් කරන හැටි“. ඔය වාක්‍ය ඛණ්ඩය තීර්ථ යාත්‍රිකයට කාලෙකට කලින් සෑහෙන්ඩ අහන්න ලැබිච්චි දෙයක්. ඒකට ප්‍රධාන හේතුව එක දවසක් තීර්ථ යාත්‍රිකයගේ ඥාති සහෝදරයෙක් කරපු අභියෝගයකට පිළිතුරු හැටියට ඔහුගේ ෆේස්බුක් ගිණුමේ තිබුන ප්‍රොෆයිල් ඡායාරූපය වෙනුවට තටු හැලිච්චි පැස්බරෙකුගේ ෆොටෝ එකක් ආදේශ කිරීමත් සමඟයි.

“මගේ එකවුන්ට් එක හැක් වෙලා..,මගෙ එකවුන්ට් එක හැක් කරලා“.. මේවා කොයි කාලෙත් අඩු නැතිව අහන්න ලබෙන දේවල්. කොච්චර අලුත් ආරක්ෂන විදි ආවත්, කොච්චර දැනුවත් කිරීම් වුනත් මේ දේ වැඩියක් මිසක් අඩුවක් නම් නැහැ. කිසිම පරිගණක පද්ධතියක් සියයට සියයක් ආරක්ෂිත නැහැ. ඒක ආයෙ ඉර හඳ වගේ සහතික දෙයක්. පරිගණක පද්ධති සියයට සියයක් ආරක්ෂිත නොවෙන්න විවිදාකාර හේතු තියනවා. ඉන් ප්‍රධානම එකක් වෙන්නේ පාවිච්චි කරන්නා අතින් වෙන අතපසු වීම්. ආරක්ෂිත ප්‍රොටොකෝල යොදල දත්ත එන්ක්‍රිප්ට් කරලා, පාස්වරඩ් හෑෂ් කරල ඒ මදිවට සෝල්ට් කරල, බග්ස් උපරිම අඩු සිස්ටම් එකක් හැදුවත් වැඩක් නෑ පාවිච්චි කරන පුද්ගලයා අතින් යම් අතපසු වීමක් වුනොත්.

පොඩ්ඩක් හොයලා බලපුවාම හැම අවුරුද්දෙම වගේ යම් ප්‍රතිශතයක් භාවිතා කරන්න එපාම කියල තරයේ අවවාද කරල තියන අනාරක්ෂිත රහස්පද ඔහේ භාවිතා කරලා තියනවා.වසරේ අනාරක්ෂිතම මුරපද ලයිස්තු කියල අන්තර්ජාලයේ බලපුවාම හැම අවුරුද්දෙම එකම මුරපද නැවත නැවත භාවිතා වෙලා තියනවා.ඒ වගේම Lulzec වගේ කට්ටිය නිදහස්කරපු ඩේටා බේස් ඩම්ප් බලපුවාම ,පරිශීලකයො භාවිතා කරපු අනාරක්ෂිත මුරපද ටොන් ගනං හොයාගන්න පුලුවන්. මේ දේ වලක්වන්න බෑ පොඩි උන් ලොකු වෙනවා කියන එක නවත්තනකල් (:D) .  මැටි මුරපද භාවිතා කරලා පාඩම් ඉගන ගෙන හරි , එහෙම නැත්තං දැනුවත් වෙලා හරි ආරක්ෂිත උපක්‍රම ඉගන ගෙන එක කාණ්ඩයක් අන්තරාදායක සීමාවෙන් එළියට යද්දි ඒ අඩුව පුරවන්න තව නොදැනුවත් කාණ්ඩයක් එකතු වෙනවා හරියට චක්‍රයක් වගේ...

මෘදුකාංගයක් ලියද්දි තියන හැම කේස් එකක්ම පරීක්ෂා කෙරෙන්නෙ නෑ. ප්‍රධානම හේතුවක් තමයි වෙන්න පුලුවන් සියලුම සිද්දි 100%ක්ම හොයාගැනීම අපහසු වීම. අනිත් දේ තමයි මූල්‍යමය සාධකය. තියන හැම කේස් එකක්ම සියයට සියයක් හොයන්න යනවා කියන්නේ කාලය ගතවෙන වැඩක් ඒ නිසා මෘදුකාංගයේ වියදම ඉහල යනවා. ගොඩක් වෙලාවට පරීක්ෂා කරලා භාවිතයට යොදවලා කාලයක් යනතුරුත් විවිදාකාර බග්ස් මතු වීම සහ ඒවාට පිළියම් යෙදීම සිද්ද වෙනවා. අන්න ඒ කාලෙ ඇතුලෙ ඒ බග්ස් ෆික්ස් කරන්න කලින් ඒවා හොයාගන්න උදවියට පුලුවන් සිස්ටම් එකට සිස්ටම් එක සම්පූර්ණයෙන් බිඳ වැට්ටවීමේ සිට විවිදාකාර විනෝදාස්වාදයන් ලබාදෙන්න. ඕනම මෘදුකාංගයක මයිල්ස්ටෝන් සහ වර්ෂන් වල ඉතිහාසය බලපුවාම අහවල් බග් එක හැදුවාය..අහවල් බග් එක හැදුවාය කියලා පෝලිමට දකින්න පුලුවන්.ඒ නිසා බග්ස් කියන දේවල් මෘදුකංගවල තියන බොහොම සාමාන්‍ය දේවල්.

අපි ගොඩ දෙනෙක් මෘදුකාංගයක් ලියද්දි සියයට සියයක්ම අපිම කේතයන් ලියන්නෙ නැහැ.ගොඩක් වෙලාවට කරන්නේ මොකක් හරි පාදමක් උඩ ඉඳගෙන වෙන වෙන අය ලියපු කෝඩ්ස්, ප්ලගින්, කොම්පොනන්ට් ආදිය එකට අමුනලා අපිට ඕන කරන වැඩේ වෙන්ඩ හදන එක. රෝදෙ කියන දේ නැවත නැවත නිපදවනවාට වඩා හදලා තියන රෝදයක් පාවිච්චි කරන එක වෙලාවේ ඉතුරුවක්. හැබැයි ඔය රෝද අතරේ පැච් ගිය ඇද වෙච්චි රෝද තියෙන්නත් පුලුවන්, පදින්න ගත්තාම වැටෙන විදිහට උවමනාවෙන්ම හදපු රෝද තියෙන්නත් පුලුවන්. ඒ හින්දා පිනට දෙන ප්ලගින් එකක් හරි කොහෙ හරි තියෙන කෝඩ් එකක් හරි සිස්ටම් එකට අමුනන්න කලින් ඒකෙන් වෙන දේ හොඳට බලන එක ඇඟට ගුණයි.නැතිනම් පසුවට දාහක් ප්‍රශ්න මතුවෙන්නට පුලුවන්.

එදා සිටම අද දක්වාම පරිගණක පද්ධති අස්සට රිංගන්නට භාවිතා කරන ජනප්‍රියම වගේම වඩාත් සාර්ථකම ක්‍රමයක් තමයි සෝෂියල් ඉන්ජිනියරින්. මනුස්සයෙක් එක්ක කතාකරලා එයා නොදැනුවත්වම තමන්ට අවශ්‍ය සංවේදී දත්ත එයාගෙන් ලබාගන්න එයාව මැනිපියුලේට් කරන එකත් එක්තරා ආකාරයක කලාවක්. තීර්ථ යාත්‍රිකයගෙ පුද්ගලික අත්දැකීම් ගැන කියනවා නම් ඉගන ගන්න දවස්වල කීපවතාවක්ම විවිදාකාර සෝෂල් ඉන්ජිනියරිං ක්‍රම භාවිතාකරලා සාර්ථක ප්‍රථිපල ලබාගන්න තීර්ථ යාත්‍රිකයාත් සමත් වෙලා තිබෙනවා.  අද ලෝකයේ සිද්ද වෙන අනවසර පිවිසීම් වලින් ගොඩාක්ම සිදුකරන්නට උපකාර කරගන්නේ මේ කියන සෝෂල් ඉන්ජිනියරිං.ඒකට හේතුව සියලු ආරක්ෂක පද්ධති බිඳ හෙලලා පරිගණක පද්ධතියකට ඇතුලු වෙන එක කරන්නට පුලුවන් ඒ පිළිඹඳ ප්‍රවීන දැනුමත් තියන දක්ෂයන්ට පමණක් වීම නිසා සහ සෝෂල් ඉන්ජිනියරින් හරියට කරගත්තොත් වැඩේ හුඟක් ලෙහෙසි නිසා. දොරක අගුල පන්නනවට වඩා යතුර හොරකං කරං දොර ඇරගන්න එක ලේසියිනේ.

පරිගණක භාවිතය ලේසියි. පරිගණක භාවිතයෙන් ගොඩක් දේවල් මේසෙ ගාව ඉඳලම කරගන්න පුලුවන්. ඒ වගේම ප්‍රවේසම් නොවුනොත් ආයෙ හදන්න බැරි අවුලක් වෙන්නත් පුලුවන්. ඒ නිසා පරිගණක භාවිතා කරන විට කරන්නන් වාගේ නොකර අවබෝධයෙන් යමක් කරන්න ඕන. ඒ වගේම යම් දෙයක් කරද්දි ඇයි ඒක කරන්නේ කියන දේ පිළිඹඳ දැනගෙන ඉන්න එකත් හොඳ දෙයක්.නිතර දෙවේලෙ තිබෙන මෘදුකාංග යාවත්කාලීන කරගැනීම, භාවිතා කරන මෘදුකාංගවල සැකසුම් පිළිඹඳ හොඳ අවබෝධයක් තිබීම, අහුවෙන අහුවෙන හැම මෘදුකාංගෙම පරිගණකයේ ස්ථාපනය නොකිරීම වගේ දේවල් හොඳ පුරුදු.පරිගණක සහ අන්තර්ජාලය පිළිඹඳ තිබෙන දැනුම වැඩිකරගැනීම වගේම යමක් කරද්දි හොඳට මොලේ කල්පනා කරලා වැඩ කිරීමෙනුත් තමනුත් තමන්ගේ තිබෙන පුද්ගලික දත්තත් ආරක්ෂා කරගෙන “අනේ මම හැක් වුනා“ වගේ දේවල් තව දුරටත් නොකියා ඉන්නට කෙනෙකුට හැකියාව ලැබෙනවා.

මේක ක්‍රමානුකූලව ලියවුන ලිපියක් නෙවෙයි. ඔහේ හිතට ආපු කරණු ටිකක් ගලපලා ලියපු එකක්. ඒ නිසා අපිලිවෙලයි අපිලිවෙලයි වගේ නම් ඒ කමා කරන්ට ඕන. :D....
Read More...

සිත් ඇදගත් මාලා නාටක (මම බලන ටීවී සීරීස්)

5 comments
  1. The Mentalist 
 තීර්ථ යාත්‍රිකයා නරඹා ඇති මාලා නාටක අතුරින් විශිෂ්ඨම මාලා නාටකයක් ලෙස The Mentalist හැඳින්විය හැකියි. මේ දක්වා මාලා 5 ක් විකාශය වී අවසන් . කතා මාලාවේ ගලා යාම ගැන සඳහනක් කලොත්, CBI (California Bureau of Investigation) යන කැලිෆෝනියාව පදනම් කරගත් විමර්ශන අංශයට විවිධ අපරාධ විසඳීමට උපකාර කරන පැට්‍රික් ජේන් (Patrick Jane) නම් ස්වාධීන උපදේශකයෙකු වටායි කතාව ගෙතෙන්නේ. ඔහු මිනිසුන්ගේ හැසිරීම් රටා නිරීක්ෂනය කොට ඒ ඇසුරින් තොරතුරු උකහා ගැනීමේ සමතෙක්. එමෙන්ම විවිධ ඇස්බැන්ඳුම්, මෝහනය කිරීම් සහ මිනිසුන් මැනිපියුලේට් කිරීමේ දක්ෂයෙක්. ඔහුත් සමඟ CBI ඒජන්තයන් 4 දෙනෙකුගෙන් යුත් කණ්ඩායමක් සිටිනවා. පැට්‍රික් ජේන් ((Patrick Jane) සාමාන්‍ය අපරාධ විසඳන අතරතුරේදී ඔහුගේ බිරිඳ සහ දියණියත් ඇතුලු තවත් මිනිසුන් ගණනාවක් ඝාතනය කල Red John නමැති සට කපට සීරියල් කිලර් අල්වාගැනීමේ උත්සාහයක නිරත වීම කතා මාලාව පුරාම විසිරී යනවා.  කතා රචකයා මෙම Red John නැමති මිනීමරුවා නිර්මාණය කල ඇති අපූරුවමය ස්වභාවය නිසා එම චරිතය අන්තර්ජාලය තුල බෙහෙවින්ම කතාබහට ලක්වුනා. Who is the Red John  ෆෝරම් අඩවියක්ද නිර්මාණය වී තිබෙන්නේ ඔහු කවුරුදැයි යනුවෙන් කතාබහට ලක්කිරීමටයි. කතා මාලාව පුරාවටම Red John චරිතය ප්‍රේක්ෂකයාට නිරාවරණය වන්නේ නැහැ. අධ්‍යක්ෂකට අනුව මීළඟට විකාශය වීමට නියමිත 6වන  කතාමාලාවේදී Red John ගේ අනන්‍යතාවය නිරාවරණය වනවා. ඒ සමඟම කතාමාලාව අවසන් වනවාද නැතිද යන්න ඔහු ප්‍රකාශ කොට නැහැ.

මේ තිබෙන්නේ Red John ගේ සංකේතයයි. ඔහු මනුෂ්‍ය ඝාතනයක් කල විට ඝාතකයා ඔහු බව ලෝකයට සැල කර සිටීමට ඝාතනය වූ පුද්ගලයාගේ රුධිරයෙන් මෙම සංකේතය අඳිනු ලබයි. ගංගොඩවිල විජේරාම පටුමගේ තාප්පයකත් මෙම සංකේතය ඇඳ තිබෙනු තීර්ථ යාත්‍රිකයා දැක තිබෙනවා :D . The Mentalist හි නිරුවත් දර්ශන අඩංගු නැති අතර අසභ්‍ය වචන භාවිතයද නොසැලකිය හැකි තරම් අඩු තත්වයක පවතිනවා.

2. Game of Thrones


පැරණි යුගයට අයත් කතාවක් ලෙස ගලා යන Game of Thrones ලොව පුරා අතිශය ජනප්‍රිය වුනා. මේ වන විට කොටස් දහය බැගින් වූ මාලා දෙකක් විකාශය අවසන් වී ඇති අතර වර්තමානයේ තෙවන කතා මාලාව විකාශය වෙනවා. තොරතුරු වලට අනුව 2014 දී සතරවන මාලාවද විකාශය වීමට නියමිතයි.  Game of Thrones නිර්මාණය කර ඇත්තේ A Song of Ice and Fire ලෙසින් නම් කොට ඇති ෆැන්ටසි නවකතා මාලාවක් ආශ්‍රයෙනුයි. බලකාමී රදල පවුල් ඔවුන්ගේ බලය රැක ගැනීමට සහ වර්ධනය කරගැනීමට ගන්නා විවිධ උපක්‍රම, ඔවුන්ගේ බලලෝභය හමුවේ අසරණ වන පීඩිතයන්, යුද්ධ සහ ලේ වැගිරීම් මේ කතා මාලාව පුරාම විසිරී පවතිනවා.


තෙවන කතා මාලාව නිකුත් වීමට ආසන්නයේ Game of Thrones පිළිඹඳ උනන්දුව උන්මාදයක් මෙන් පැතිරුනා. ඉහලින් දැක්වෙන්නේ ඒ කාලයේ නිර්මාණශීලී ලාංකිකයෙකු අතින් බිහිවූ නිර්මාණයක්. මෙය උපුටාගත්තේ ෆේස්බුක් අඩවියෙන්.නිර්මාණකරු පිළිඹඳ සඳහනක් තීර්ථ යාත්‍රිකයා සතුව නැහැ.එම නිසා නිර්මාණකරු සම්බන්ධ ලින්ක් එකක් ලබා දුනහොත් එය පලකරීමට තීර්ථ යාත්‍රිකයා මැලි වෙන්නේ නැහැ.

Game of Thrones හි කැපුම් කෙටුම් වද හිංසා ආදිය බහුලව තිබෙනවා. එමෙන්ම හිස් ගසා දැමීම්, කැපීම් කෙටීම් ආදිය අතිශය තාත්වික අන්දමට නිරූපණය කර තිබෙනවා.එම නිසා එවැනි දර්ශන බැලීමට අපහසුනම් Game of Thrones ඔබ සඳහා නොවෙයි. මෙහි නිරුවත් ලිංගික දර්ශනද රාශියක් අඩංගු බව හොඳින් මතකයේ තබාගත යුතු බව තීර්ථ යාත්‍රිකයා නිර්දේශ කරනවා.

මේ පිළිඹඳ කොටස් කිහිපයකින් ලිවීමට අදහස් කරන නිසා ඉතිරිය පසුවට........

Read More...

Saturday, May 11, 2013

පාර්ලිමේන්තුව ඇතුලට සඳ පායනවා !!!

7 comments
පාර්ලිමේන්තුව ඇතුලට සඳ පායනවා
සඳ එළියට පිස්සු හැදිල බල්ලො බුරනවා
සිංහ පැටව් වාගේ බුරනවා
බල්ලො හඳට යන්න හදනවා........

අජිත් කුමාරසිරි ගැන මුලින්ම දැක්කෙ චමිල ලියපු ලිපියකින් . හොයාගන සින්දුවක් දෙකක් අහන්නං කියල හිටියත් ඒක හිමීට අමතක වෙලා ගියා. පහුගිය දවසක ඕක ආයෙ මතක් වෙලා You Tube වල හොයද්දි සිංදු ලිස්ට් එකක්ම හම්බවුනා.  ඔහුගෙ හඬ ගොරහැඩියි , බැරැන්ඩියි,  සින්දුවල ගීතවත් භාවය අඩුයි රලු ගතියක් තියෙන්නේ, අමුතුම ශෛලියක්. නමුත් මොකද්දෝ කියන්න බැරි හේතුවක් නිසා ඒ ශෛලිය මගේ හිත ගත්තා. 
සංගීතය සහ සින්දුවල තියෙන ලස්සන කියන දේ පුද්ගලානුබද්ධයි. ඒක එකිනෙකාගෙ රසඥතාවය අනුව වෙනස් වෙනවා. “ඔයා නිසා හඬලා, මගේ ඇසුත් රිදුනා... එහෙමත් නැත්තං සුදු අරලියා මල ... පිපුනේ ඇයි තනිව...“ වගේ සින්දු සමහර අයට lame නැත්තං චොකා සිංදු වෙද්දි  තවත් සමහරකට සුපර් හිට්ස් වෙන්නේ ඒකයි. විවිදාකාර සින්දු, ගායන ශෛලීන් අතර අතර අජිත් කුමාරසිරිගෙ තැන කොතනද ? ඒක හරියටම කියන්න අමාරුයි. ලංකාව ඇතුලෙ උනත් ඔහු ගොඩක් ප්‍රසිද්ධ චරිතයක් නෙවෙයි නමුත් අජිත්ට ප්‍රිය කරන රසික සමාජයක් ඉන්නවා.

දැං බල්ලන්ට හරි ජයයි...
අපි බල්ලන්ට හරි බයයි..
මේ බල්ලො සුද්දන්ට බයයි...
අපි සුද්දන්ට ණයයි....

අජිත් කුමාරසිරිගෙ ශෛලියට ටිකක් හරි ළඟින් යන සින්දුවක් විදිහට මම දැකල තියෙන්නේ අමිල සඳරුවන්ගේ “ජෝන් සීනා අපෙ පොඩි එකාට ගහලා“ විතරයි. නමුත් ඒ ගැලපීම යන්තමින් හරි තියෙන්නේ මතුපිටින් විතරයි,  අජිත්ගෙ සිංදු වල තිබෙන තියුණු උපහාසයට, ප්‍රභල පහර ගැසීමට සහ යටින් මතු කරන ප්‍රබල කතාන්දරය ඒ විදිහට මතුකරන සිංහල සින්දු බොහෝම අල්පයි. ඔහුගෙ සමහර සින්දු වලින් ඔහු මතුකරන්න යන දේට මම පුද්ගලිකව එකඟ නැති වුනත් ඔහු සමාජයේ වැදෙන්න ඕන තැන් වලට වදින්න ගහන හැටි නම් හරිම අපූරුයි. ඒ හින්දම මම ඔහුගෙ ගීත ප්‍රිය කරනවා.

කනකොට වල් ඌරො ලස්සනයි
කනකොට කුකුල්ලු හුඟක් ලස්සනයි
කනකොට රටත් ... කනකොට රටත් ලස්සනයි


Read More...

Tuesday, April 16, 2013

ඔබත් අඩි හයේ කල්ලියේද ? Are you six feet tall ?

16 comments
සුභ නව වසරක් වේවා සමස්ත බ්ලොගොස්පියරවාසී හිතවතුන්ට !!!
තීර්ථ යාත්‍රිකයා අයත් වෙන්නේ හයේ හතරේ කුලකයට.පැහැදිලිව කිව්වොත් උස අඩි හයකුත් උචිත මහතිනුත් යුක්තයි.ඉතින්  කියවන ඔබත් අඩි හය හෝ එයට වැඩි උසකින් යුක්ත හයේ හතරේ කල්ලියට අයත් කෙනෙක් නං සහ ජීවත් වෙන්නේ සසිරිබර මෙසිරිලක :D නං මේ කියන්න යන දේවල් ඔබට අමුතු කාරණා වෙන්නේ නැහැ. අඩි හයේ කුලකයට අයත් වීම මොන වගේද ? ඒකෙ හොඳ පැත්ත වගේම නරක පැත්තකුත් තියනවා.



  • බස්වල ගමනේ යෙදෙන විට බොහෝවිට දණිස් ඉදිරිපස ආසනයේ වැදීම. ඇතැම් බස්වල කොහෙත්ම ඉඳගන යාමට නොහැකිවීම සහ තව සමහරක් බස්වල ඉඳගන හෝ සිටගන යාමට නොහැකිවීම (ඉඳගැනීමට නොහැකි තරම් ලඟින් ආසන සකස්කර තිබීම සහ සිටගත් විට හිස වහලයේ වැදීම නිසා.)
  • දුම්රියවල බස්රිය වල ඇති උස ආසන වලට වඩා ඉහළින් හිස තිබීම නිසා දුර ගමනක් යාමේදී වුවත් හේත්තු වී නිදා ගැනීමට නොහැකිවීම.(මෝටර් රථ වෑන් රථ බොහෝ ඒවායේ මේ ප්‍රශ්නය නැත)
  • කුඩා මෝටර් රථවල ගමන් කිරීමට ඇති අපහසුව. (මරුටි 800 වැනි රථවල හිස වහලයේ ගෑවෙන නොගෑවෙන තරම්ය.)
  • උලුවහු වල වහලවල් වල වැදී හිස පලාගැනීමේ වාසනාව. :D . ලංකාවේ බොහෝ නිවෙස්වල ඇතුලු උලුවහු පිළිඹඳ අවදානයෙන් නොගියහොත් මේ අකරතැබ්බයට මුහුණ දීමට සිදුවේ.දරමැස්සක තහඩු වහලයේ වැදී තීර්ථ යාත්‍රිකයාගේ හිසේ ඇති තුවාල කැලැල තවම මැකී නොමැත.
  •  වැසි දිනයක එළියට යන්නේ නම් ප්‍රවේසම් විය යුතුය.නැතහොත් අනෙක් උදවියගේ කුඩ වල නන මුහුණේ හෝ ඇසේ වැදීමට ඉඩ ඇත.
  • අඩි හයක් උසැති ඊට සරිලන පරිදි මහත ඇත්තෙක් නම් ඔබේ බර අනිවාර්යෙන්ම කිලෝ අසූව ඉක්මවයි.එබැවින් වාඩි වීමේදී, විශේෂයෙන්ම ප්ලාස්ටික් පුටු වල වාඩිවීමේදී ඒවායේ ශක්ති සම්පන්න ස්වභාවය සම්බන්ධයෙන් දල අවබෝධයක් තිබිය යුතුය.නැතිනම් මීට වසර කිහිපයකට පෙර තීර්ථ යාත්‍රිකයාට වූවා මෙන් ප්ලාස්ටික් පුටුවක් කඩාගෙන වැටීමේ භාග්‍ය ඔබට හිමිවීමේ සම්භාවිතාවය බොහෝ වැඩි විය හැකිය.
  • ඇඳුම්,සපත්තු මිලට ගැනීමට යාමේදී බහුතරයක් වෙලඳ සල් වලදී වැඩි තේරීම් වලට ඉඩ නැත. ශරීර ප්‍රමාණයට සරිලන ඉතා අල්පයක් වූ විලාසිතාවන්ගෙන් කැමති ඒවා තෝරාගත හැක. එමෙන්ම වෙලඳ සහායකට ඉණේ ප්‍රමාණය (35+), ටීෂර්ට් ප්‍රමාණය (XXL,17 1/2 හෝ +), සපත්තු වල ප්‍රමාණය (10+) පවසා ඔහුගේ (ඇයගේ) දෙබැම ඉහළ යනු නැරඹිය හැක. :D
  • කහසාරියක් තෝරා ගැනීමේදී කැමති සාධක සියල්ලට අමතරව ශරීර ප්‍රමාණය යන සාධකය තීරණාත්මක වේ. නැතිනම් තත්වය සෝචනීය වීමට ශක්‍යතාවයක් පවතී. (If you know what I mean ;) ). 
  •  සාමාන්‍ය කුඩා ඇඳන් වල නිදාගැනීමේදී දැඟලීමේ ආශ්වාදය ලබාගත නොහැක. ඒ හිස සහ දෙපා ඇඳ විට්ටමේ වදිනා බැවිනි. එමෙන්ම සෝෆා වල සැපට නිදා ගැනීම කල නොහැක.
  • උස මහතින් යුක්ත නිසා පිරිස අතරේ කැපී පෙනේ. එය හොඳ පක්ෂයට මෙන්ම නරක පක්ෂයටද අයත් ලෙස සැලකිය හැක.
  • උස මහතින් යුක්ත නම් හා රලු බැල්මක් ආරූඩ කරගත හැකිනම් කිසිවෙකු ඔබට පහර දීමට පැමිණෙනවා නම් ඒ පිළිඹඳව දෙතුන්වරක් සිතීමට පෙලඹේ.
  • බොහෝ උදවිය කෙනෙකු මනින්නේ පෙනුමින් නිසා උස මහතින් යුක්ත වීම ආත්මාරක්ෂාවට උදව්වේ.
  • නිවැරදි ව්‍යායාමයන්ගෙන් ශරීරය නිසි පරිදි නඩත්තු කරනවා නම් උස මහතින් යුක්ත වීම කෙනෙකුට සම්පතකි. :D
  • ලංකාවෙන් පිටත කෝකේසියන් වරු වාසය කරන රටකට ගිය විට බහුතරයක් ආසියානුවන්ට වන පරිද්දෙන් ඔවුන්ට වඩා ශරීර ප්‍රමාණයෙන් ඔබ කුඩා නොවනු ඇති.

ප.ලි
ඇඳුම් ගන්නේ කොළඹින් නම් බම්බලපිටියේ ඩුප්ලිකේෂන් පාරේ පිහිටි ඩබල් එක්සෙල් හි ඔබට සරිලන ඇඳුම් පැළඳුම් ඇත. එමෙන්ම හවුස් ඔෆ් ෆැෂන් සහ ඔඩෙල් හිද සමහර CIB ආයතනවලද විශාල ඇඳුම් පැළඳුම් ඇත.
Read More...

Wednesday, April 3, 2013

Huawei 8650 රූට් කිරීමේ පියවරයන්. How to root huawei sonic 8650

2 comments
පහුගිය ලිපියෙන් ඇන්ඩ්‍රොයිඩ් දුරකතනයක් රූට් කිරීම ගැන පසුබිම් කතාව කලා. මේ ලිපියෙන් ප්‍රධාන වශයෙන් කතාකරන්න යන්නේ  Huawei 8650 (Sonic)  වර්ගයේ දුරකතනයක් රූට් කරගැනීම තීර්ථ යාත්‍රිකයා සිදු කල ආකාරයයි.

Read More...

Tuesday, March 26, 2013

ඇන්ඩ්‍රොයිඩ් දුරකතනය රූට් කලෙමි. Just rooted my android phone

9 comments
SE OS , සිම්බියන් ,වින්ඩෝස් ෆෝන් එක්ක හක්කලං කර කර ඉඳලා තීර්ථ යාත්‍රිකයා ඇන්ඩ්‍රොයිඩ් වලට මාරු උනා. මේ දක්වා භාවිතා කරපු මොබයිල් මෙහෙයුම් පද්ධති එක්ක බලපුවාම ඇන්ඩ්‍රොයිඩ් කියන්නේ අති විශිෂ්ඨ මෙහෙයුම් පද්ධතියක්. ඕකට විරුද්ධ වෙන උදවිය ඉන්නත් පුලුවන්, නමුත් තීර්ථ යාත්‍රිකයාගේ පුද්ගලික මතය අනුව නං ඇන්ඩ්‍රොයිඩ් එක්ක කරට කර යන්න පුලුවන් IOS වලට විතරයි.

ඇන්ඩ්‍රොයිඩ් කියන්නේ ලිනක්ස් පාදක කරගත් මෙහෙයුම් පද්ධතියක්. ඔය ලිනක්ස් මෙහෙයුම් පද්ධති (උබුන්ටු , රෙඩ් හැට් වගේ එව්වා) වලට කියල ටිකක් ලොකු වැඩක් කරගන්න ඕන නං “සුදෝ“ කියල ආදරෙං අමතන්න ඕන ෂෙල් එකේදී.  :D

Read More...

Wednesday, February 20, 2013

තීර්ථ යාත්‍රාව තෙවර්ෂ පූරණය

10 comments
තීර්ථ යාත්‍රිකයා, අපමණ වූ වෙබ් සයුරේ යාත්‍රාකරන්නාවූ  තීර්ථ යාත්‍රාව බ්ලොගයට 2013 නවම් මාසයට තෙවර්ෂක් පූරණය වූ බව බ්ලොගොස්පියර වාසී මිතුරන්ටත් , සමස්ත පාඨක ජනතාවටත් හදපිරි සතුටින් දැනුම් දෙමි......

*********************************************************************************
තීර්ථ යාත්‍රිකයා බ්ලොග්කරණයට පැමිණිය හැටි සහ ඉතිහාසය තීර්ථ යාත්‍රාවට දෙවර්ෂ පූරණය සිදුවූ පසු ලිවූ
බ්ලොග්කරණයේ දෙවසරක්“  ලිපියේ සඳහන් වන බැවින් නැවත ඒ පිළිඹඳ ලිවීම අනවශ්‍ය යැයි සිතමි...
Read More...

Tuesday, February 12, 2013

හුදෙකලා චාරිකා

11 comments
ගමේ නොගිහිං කොළඹ ඉන්න සති අන්තය කම්මැලියි. සති අන්තෙට කොළඹ හිටියොත් ගොඩක් වෙලාවට කරන්නේ කොහේ හරි රස්තියාදුවක යන එක. කැමරාව සයිඩ් එකට එල්ලං හොඳ දර්ශනයක් හොයාගන ඉබාගාතේ යද්දි සමහර වෙලාවට ආරක්ෂක අංශවල උදවිය අහන්නේ “මහත්තය මීඩියාද කියලා“ . නැහ් කියල කිව්වාම කිසිම අවුලක් නැතිව ගියෑකි. හේතුව නං දන්නෑ ඒත් පේන විදිහට නං ආරක්ෂක අංශ මාධ්‍ය ක්ෂේත්‍රයේ උදවියට කැමැත්තක් නැති හැඩයි. එතකොට තමයි හිතෙන්නේ හොඳ වෙලාවට තමයි මාද්‍යකාරයෙක් නොවුනේ කියලා.

කොළඹ කියන්නේ අපූරු නගරයක්. හොඳ පැත්තෙන් වගේම නරක පැත්තෙනුත් හැම දෙයක්ම තියනවා. විවිදාකාර සිද්දි ,විවිදාකාර තැන,විවිදාකාර ජාතියේ උදවිය ගේ සම්මිශ්‍රණයක්. වේලාසන දාගත්ත රස්තියාදු චාරිකාවට එන්න හිටපු එකාගේ අයහපත් සෞඛ්‍ය තත්වය හේතුකොටගෙන කම්මැලි සහගත ,සහ උදාසීන බවින් පිරිච්චි ඒ ඉරිදා දවසේ හිටි අඩියේ ආපු “මසාල තෝසෙ“ බඩගින්නක් නිසා කොළඹ නගරයේ මගේ ප්‍රියතම නිර්මාංශ අලවිහලක් වෙච්චි බම්බලපිටියේ “සරස්වතී ලොජ්“ වෙතට යන්න මම එලියට බැස්සා දොලහ හමාරට. ඇයි බම්බලපිටියටම ? .... විශේෂයක් නෑ..ඒත් මූදුබඩ පැතිවලට මං ආසයි......

Read More...
.